नेकपा एमाले कमजोर भएमा देशमा संकट आउनुको साथै लोकतन्त्र समेत धरापमा पर्ने नेकपा एमाले धादिङका अध्यक्ष भूमि त्रिपाठीले बताउनुभएको छ ।
नेकपा एमाले प्रचार विभागद्धारा आज एमाले पार्टी कार्यालय धादिङ बेशीमा स्थापना गरिएको प्रचार डेस्कको शुभारम्भ गनुृहुँदै अध्यक्ष त्रिपाठीले स्थानीय चुनावमा नेकपा एमालेलाई जिताउनु पर्ने बताउनु भएको हो ।
विगतको निर्वाचन पार्टीका लागि हुने गरेकोमा यो पटक राष्ट्रको प्रतिनीधि र परमादेसका पक्षधरहरुका वीच चुनाव हुन लागिरहेको र जनताले एमालेलाई राष्ट्रिय हितको लागि चुनाव जिताउने पनि अध्यक्ष त्रिपाठीले बताउनु भयो । बाहिर प्रचार गरिए जस्तो नेकपा एमाले कमजोर नरहेकोले बलियो आत्मविश्वासको साथ चुनावी मैदानमा उत्रिन कार्यकर्तालाई अध्यक्ष त्रिपाठीले आव्हान गर्नुभयो ।
देशमा धेरैवटा कम्युनिष्ट पार्टी भएको भ्रम सकिएको दावि गर्दै अध्यक्ष त्रिपाठीले परमादेसको पक्षधर र नेकपा एमाले चुनावी मैदानमा रहेकोले कम्युनिष्टको नाममा पाएको जनमत कांग्रेसको पाउमा चढाउनेहरुलाई चुनावले पाखा लगाउने बताउनुभयो ।
देशमा लोकतन्त्रको रक्षाको लागि सूर्य चिन्हमा मतदान गर्न लाखौं नेपाली जनता आतुर रहेको र भ्रमवश अरु ठाउँमा गएकाहरु पनि नेकपा एमालेमा आउनेक्रम जारी रहेकोले समृद्ध मुलुक सुखी नेपाली चाहनेहरुको बीचमा सहकार्य भैरहेको अध्यक्ष त्रिपाठीले बताउनुभयो ।
नेकपा एमाले शक्तिशाली भएको कारण र नेकपा एमालेको दबाबको कारण मात्रै वैशाख ३० गते स्थानिय तहको निर्वाचन हुन लागेको अध्यक्ष त्रिपाठीले दावि गर्नुभएको छ।