धादिङ– धादिङको नीलकण्ठ नगरपालिका–३ बीचबजार चोकमा राष्ट्रिय विभुती शंखधर साख्वाको शालिक अनावरण गरिएको छ । स्थानीय टोलवासी दाताहरुको सहयोगमा स्थापना गरेको शालिक नीलकण्ठ नगरपालिका-३ का वडा अध्यक्ष राजकुमार श्रेष्ठले अनावरण गरेका हुन् ।

राष्ट्रिय विभुतीको सम्मान र जनमनमा विभुती स्थापित गराउने उद्देश्यले जिल्ला सदरमुकाम धादिङबेसी बीचबजारको चौतारोमा शालिक स्थापना गरिएको बीच बजार टोल सुधार समितिका अध्यक्ष नन्दलाल श्रेष्ठले बताए ।

शालिकसँगै कलात्मक ढुंगेधारा पनि निर्माण गरी संचालनमा ल्याइएको छ । चौतारोमा विश्रामस्थल र गणेश मन्दिर पनि पुननिर्माण गरिएको छ । गाउँगाउँबाट सदरमुकाम आइपुगेकाहरु सुस्ताउने चौतारो परिषरमा बनेको शालिक, ढुंगेधारो र मन्दिरले यो स्थान अहिले निकै सुन्दर बनेको छ ।