गजुरी/धादिङ
धादिङको गजुरी गाउँपालिका वडा नं.५ गलौदीमा रैथाने धादिङ खाना तथा कृषि पर्यटन व्यापार महोत्सव सुरु भएको छ । त्रिशुली किनारा र पृथ्वी राजमार्गको विचमा रहेको गलौदीमा रैथाने खाना, कृषि तथा पर्यटनलाई प्रबद्दन गर्ने उद्देश्यले गत विहीबारबाट महोत्सव सुरु भएको हो।

बागमती प्रदेश सरकारका पूर्व मूख्यमन्त्री शालिकराम जम्कट्टेलले महाेत्सवको उद्घाटन गरेका थिए। उद्घाटन समारोहको सम्बोधन गर्दै उनले जिविकोपार्जन भन्दा कृषिलाई व्यवसायिक रुपमा लगेर पर्यटनलाई सँगसँगै जोड्न सके धादिङको विकासमा ठूलो सहयोग पुग्ने बताएका थिय।

गिठ्ठा भ्याकुर, झार्लाङको आलु, लापा र तिप्लिङको कोदाको ढिडो, सल्यानटारको मास, थाक्रेको उखु लगायतका उत्पादनले प्रसिद्ध रहेका छन् । तर महोत्सवको नाममा कमाउ धन्दा मात्र भईरहेको छ। ‘महोत्सवमा कृषिजन्य उत्पादन स्टलमा एउटा बन्दा, एउटा मकै र एउटा खुर्सानीको बोट मात्रै रहेको छ। होटलहरुमा विभिन्न परिकार रहेपनि रैथाने परिकार नभएको महाेत्सव अवलोकनकर्ता बताउछन् ।

जिल्ला होटल संघ धादिङले आयोजना गरेको महोत्सवको गजुरी गाउँपालिका संरक्षक रहेको छ । परम्परागत कला संस्कृति औद्योगिक व्यापार कृषि, घरेलु, हस्तकला तथा पर्यटन प्रवद्र्धन गर्ने मूख्य उद्देश्य रहेको आयोजकले जनाएता पनि महोत्सवलाई व्यापार मात्रै बनाउदा रैथाने धादिङ खाना तथा कृषि पर्यटन व्यापार महोत्सव नाममा मात्रै सिमित बनेको हो।रैथाने खाना, कृषि, पर्यटन नाम जोडेर आयोजना गरिएको महोत्सवको मूख्य प्रायोजक हिमालयन वियर रहेको छ । महोत्सवमा कुषिजन्य उत्पादन तथा रैथाने खानेकुरा नहुदाँ महोत्सवमा अधिकांश स्टलहरु खाली रहेका छन् ।गत बिहीबार देखि सुरु भएको महोत्सव २४ गतेसम्म चल्नेछ ।