महादेववेशी/धादिङ
धादिङको थाक्रेमा जनप्रतिनिधि र कर्मचारीका छोराछोरी सामुदायिक विद्यालयमै पढाउनुपर्ने निर्णय भएको छ।थाक्रे गाउँपालिकाले सामुदायिक विद्यालयको गुणस्तर अभिवृद्धिका लागि विशेष पहल गर्दै अबदेखि गाउँपालिकाभित्र कार्यरत शिक्षक, कर्मचारी तथा जनप्रतिनिधिका छोराछोरीलाई अनिवार्य रूपमा सामुदायिक विद्यालयमै भर्ना गराउनुपर्ने निर्णय गरेको छ।

गाउँ कार्यपालिकाको कार्यालयमा वैशाख ७ गते बसेको बैठकको निर्णयअनुसार उक्त नियम लागू गरिएको हो। निर्णय अनुसार अबदेखि सामुदायिक विद्यालयमा कार्यरत शिक्षक, विद्यालय व्यवस्थापन समिति, शिक्षक अभिभावक संघ तथा अन्य सरोकारवालाहरूका सन्तानलाई निजी विद्यालयमा नभई अनिवार्य रूपमा सामुदायिक विद्यालयमै भर्ना गराउनु पर्नेछ।

यस निर्णयको कार्यान्वयनका लागि गाउँपालिकाको शिक्षा शाखाले एक सूचना पत्र जारी गर्दै सबै सरोकारवालालाई निर्णयको पालना गर्न अनुरोध गरेको छ।